Амбасадорот на Република Хрватска во Македонија, Златко Крамариќ учествуваше на вечерашната трибина „Застапничка кампања за лобирање за започнување на преговори за членство на Македонија во Европската Унија и НАТО” во организација на Македонско-хрватското друштво од Тетово што се одржа во големата сала на Советот на општина Тетово.
Овој проект е подржан и од Генералниот секретаријат при Владата на Македонија.
– Хрватска ја подржува Македонија во нејзините обиди за влез во ЕУ и ние сакаме да ги пренесеме искуствата од нашето преговарање и веќе изодениот пат за зачленување во оваа организација, изјави Крамариќ.
За учеството на македонските војници во рамките на меѓународните мисии зборуваше командантот на тетовскиот гарнизон на АРМ, мајорот Блаже Николовски.
– Нашето учество во рамките на меѓународните мировни мисии под раководство на НАТО продолжува и сметам дека од тоа имаме корист и ние како држава, но и оваа важна политичко воена организација, рече Николовски.
На трибината присуствуваше и градоначалникот на општина Тетово, Сади Беџети.