Довчерашниот селектор на романската фудбалска репрезентација – Мирчеа Луческу (80) утринава доживеа срцев удар во болница. Неговата состојба е стабилна.
Луческу поднесе оставка од својата изборна функција во четвртокот и е во болница од неделата поради проблеми со срцето, пишува ESPN.
Легендарниот тренер беше хоспитализиран откако се разболе на тренинг, три дена по поразот на неговиот тим од Турција во дополнителните квалификации за Светското првенство.
Универзитетската болница за итни случаи во Букурешт објави соопштение во петокот во кое, поради заштита на приватноста, не го спомена името на Луческу, но локалните медиуми потврдија дека станува збор за него.
„Во текот на утрото, пациентот доживеал акутен миокарден инфаркт“, се наведува во соопштението за медиумите.
„Тој бил веднаш згрижен и сите потребни медицински и терапевтски интервенции биле спроведени во согласност со важечките протоколи. Неговата состојба моментално е стабилна и под строг надзор на лекари специјалисти. Пациентот останува хоспитализиран на Одделот за кардиологија, каде што добива соодветна медицинска нега“ стои во соопштението.
Луческу беше капитен на Романија на Светското првенство во Бразил во 1970 година, а беше и селектор на нивниот деби настап на Европското првенство во 1984 година.
За време на неговата долга кариера, тој предводеше бројни клубови во Италија, Турција, Украина и Русија, а беше и селектор на турската репрезентација.
Тој се врати на клупата на Романија по 38-годишна пауза со цел да се обиде да ја предводи репрезентацијата на Светското првенство во Канада, САД и Мексико, но не успеа во тоа.