Бундеслигашот Унион Берлин ја објави својата поддршка за својот тренер Мари-Луиз Ета и ги осуди сексистичките коментари на социјалните мрежи откако таа стана првата жена тренер на клуб во историјата на машката Бундеслига.
Одговарајќи на коментар на социјалната мрежа X во кој се изразува загриженост за третманот што ќе го добие Ета и потенцијалните сексистички коментари доколку загуби натпревар, од Унион велат: „Семејството Унион се грижи за неа“.
Ета го замени Штефен Баумгарт, кој беше отпуштен викендот по поразот од Хајденхајм со 3-1. Ета, 34-годишна поранешна германска фудбалерка, е именувана за привремен тренер за преостанатите пет натпревари од сезоната, по што ќе ја го преземе раководењето на женскиот прв тим на Унион Берлин. Таа ќе го има своето деби во Бундеслигата во сабота против Волфсбург, а критиките веќе се појавија на социјалните мрежи, со пораки дека таа не е соодветна за работата затоа што е жена.
„Со сето должно почитување, тоа е сексистички“, одговорија од Унион на објава на X во која се сугерираше дека играчите нема сериозно да ги сфатат тактичките инструкции од жена.
Ета е долгогодишен член на тренерскиот штаб на Унион и главен тренер на тимот до 19 години.
По 29 натпревари во Бундеслигата, Унион е 11-ти со 32 бода, седум бода пред Сент Паули, кој го држи местото што води во плејофот за останување во лигата.
Назначувањето на Ета доаѓа повеќе од 25 години откако Каролина Мораче стана првата жена што раководеше со машки професионален тим во Европа кога се приклучи на италијанскиот третолигаш Витербезе во 1999 година.
Корин Диакре помина три сезони на чело на Клермон-Фут во француската Лига 2, од 2014 до 2017 година, пред да замине за да стане главен тренер на женскиот тим на Франција.
Во јули 2023 година, Хана Дингли стана првата жена што раководеше со професионален машки тим во англискиот фудбал кога беше назначена за привремен менаџер на Форест Грин Роверс, и покрај тоа што не го водеше тимот во натпреварувачки натпревар.