Неколку лица во Берлин претрпеа тешко труење, а еден 42-годишен маж почина откако консумираше гумени бонбони за кои се верува дека содржат THC (Тетрахидроканабинол). THC е главна психоактивна компонента на канабисот.
Берлинскиот институт за здравство издаде итно предупредување за опасните слатки. Надлежните истражуваат три поврзани случаи и се сомневаат дека сите жртви претходно консумирале бонбони со THC.
Најтешкиот регистриран случај се случи на 22 септември во берлинската населба Нојкелн.
Службите за итна помош пронајдоа маж (42) во состојба на срцев застој на улицата Киницер во 10:26 часот.
– Беше спроведена реанимација, но за жал, таа беше неуспешна. Телото на починатиот беше предадено на берлинската полиција – изјави за „Билд“ портпарол на надлежната служба.
Постојат индиции дека и овој маж консумирал сомнителни гумени бонбони пред смртта.
Четири дена претходно, на истата адреса во населбата Фридрихсхајн беа пријавени два случаи.
Противпожарните екипи први интервенираа во 10:43 часот на улицата Миленштрасе, кај жена (30) со тешки ментални нарушувања.
Според првичните информации, таа исто така консумирала бонбони со THC. Нешто повеќе од еден час подоцна, на истата адреса пристигнала брза помош и затекнала маж (40) со идентични симптоми.
Сите инциденти биле пријавени во Институтот за здравство во Берлин.
Портпаролката Дорте Арнолд за „Билд“ потврдила дека имало неколку случаи во кои луѓето покажале „различни степени на интоксикација со клиничка слика на опиоиден токсидром“ по консумирањето на бонбони со THC.
Симптомите соодветствуваат со труење со опиоиди, како што се фентанил, хероин, морфин, оксикодон или метадон. Типичните знаци вклучуваат нарушена свест или губење на свеста, бавно и плитко дишење, како и зеници стеснети до големина на глава од шпенадла. Во најтешките случаи, може да дојде до престанок на дишењето и смрт.