Во рамките на 53. издание на фестивалот „Мајски оперски вечери“, на сцената на Националната опера и балет вечер ќе биде изведена моќната опера „Набуко“ од Џузепе Верди, со почеток во 20 часот.
Изведбата ќе се реализира под диригентската палка на гостинот од Грција, Мирон Михаилидис, а режијата е на Ренато Бонајуто (Италија). Сценографијата и костимографијата се дело на Флавио Арбети и Артемио Кабаси (Италија), додека кореографијата е под водство на Маја Митровска-Богојевска.
Главните улоги во оваа изведба ги носат Луис Кансино (Набуко, Шпанија), Ханјинг Цо (Абигаиле, Кина), Николина Јаневска (Фенена), Уго Тарквини (Исмаил, Италија) и Џовани Пароди (Захарие, Италија). Покрај нив, настапуваат и Диме Петров, Ана Ројдева, Дејан Стоев, како и хорот, оркестарот и балетскиот ансамбл на Националната опера и балет.
Операта „Набуко“, едно од најзначајните дела на Верди, својата премиерна изведба ја имала во 1842 година во Миланската Скала, и се смета за дело кое трајно ја воспоставило репутацијата на Верди како композитор. Посебно место во музичката историја има хорската арија „Va, pensiero, sull’ali dorate“ („Летај на златести крилја“) – музички и драматуршки столб на делото.