Един Џеко утревечер става крај на својата репрезентативна кариера, а Босна и Херцеговина е на нозе поради својот легендарен фудбалер.
Тој им се обрати и на медиумите на прес-конференцијата, каде што беше многу емотивен.
– Некако, тие речиси 20 години прелетаа. Преплавен сум со емоции. Имавме толку многу среќни моменти заедно, но имаше и лоши. Имаше и критики – понекогаш премногу, понекогаш заслужени, понекогаш незаслужени – но ви благодарам за сето тоа. Добрата критика понекогаш може да биде корисна, да укаже на грешки што човек не ги гледа. Понекогаш не можеш ниту да признаеш дека си згрешил. Ви благодарам на сите. Чувајте ги овие момци, поддржувајте ги и кога ќе се прекине добрата серија. Тие го даваат својот максимум и, пред сè, ја сакаат Босна и Херцеговина – рече Џеко, а потоа продолжи:
– Како што се приближува натпреварот, сè повеќе ме обземаат емоции, чувствувам некаков притисок во градите. Чувство како кај момче. Беше емотивно, а емотивно е и сега. Репрезентацијата сама по себе е емоција; тие емоции ќе постојат и откако ќе престанам да играм за националниот тим, но на поинаков начин – како навивач. Делумно и поради играчите со кои сè уште играм и кои остануваат во репрезентацијата, а за кои сум сигурен дека ќе тргнат по моите стапки. Тоа е најдоброто нешто што ми се случило во кариерата. Сигурен сум дека натпреварот ќе биде емотивен; мислам дека ќе биде тешко да ги сокријам емоциите пред и по натпреварот, но штом тој ќе започне, по првиот судиски свиреж, сè друго престанува. Ова не е ревијален натпревар; во тие 90 минути, главите ќе бидат на место.
