На денешен ден, 31 август 1997 година, светот беше потресен од веста за смртта на принцезата Дијана.
Една од најомилените членки на британското кралско семејство почина во Париз, неколку часа откако автомобилот во кој се наоѓаше доживеа тешка несреќа во тунелот „Понт де л’Алма“.
Дијана се здоби со тешки повреди во несреќата, а лекарите со часови се бореле за нејзиниот живот во универзитетската болница „Питје-Салпетриер“. Веста за нејзината смрт одекна низ целиот свет, додека во болницата и околу неа се одвиваа потресни сцени, за кои со години подоцна раскажуваа нејзините најблиски.
Еден од луѓето што се наоѓале во Париз во тие часови бeше нејзиниот долгогодишен возач и телохранител, Колин Тебат.
Штом дозна за трагедијата, тогашниот принц Чарлс организираше лет од замокот Балморал во Шкотска до Франција. Со него патуваа и сестрите на Дијана, леди Сара Мекоркодејл и леди Џејн Фелоус.
Тебат пристигна во Париз рано наутро, а подоцна истиот ден се сретна со Чарлс во болницата каде што беше сместено телото на Дијана.
Според неговото сведоштво, Чарлс го праша дали во болницата има свештеници. Откако доби потврден одговор, побара да влезе во собата заедно со сестрите на Дијана и свештениците.
Принцот помина околу 15 минути покрај телото на Дијана, молејќи се заедно со нејзините сестри и двајца свештеници.
Францускиот свештеник Ив-Мари Клошар-Босу подоцна изјави дека Чарлс беше длабоко потресен.
„Чарлс ми се заблагодари. Беше многу, многу трогнат. Да, видов солзи“, рече свештеникот.
Еден од најтрогателните моменти го опиша Колин Тебат.
Болничката соба на Дијана имаше големи прозорци без завеси, а низ нив Тебат можеше да ги види луѓето на покривите на околните згради. Затоа побара прозорците да се покријат со ќебиња.
Тој исто така се погрижи телото на Дијана да биде заштитено и соодветно подготвено за пристигнувањето на семејството.
Во еден момент беа вклучени вентилатори за да се излади собата. Тебат тогаш погледна кон креветот и се случи нешто што, според него, засекогаш му остана во сеќавањето.
„Кога ги вклучив и ги насочив кон креветот, за миг помислив дека принцезата е сè уште жива. Нејзината коса се движеше, а се движеа и нејзините очни капаци“, рече тој.
Глетката толку многу го потресе што мораше да се сврти кон ѕидот.
„Срцето ми застана за дел од секундата“, рече Тебат.
Набрзо сфати дека движењето е предизвикано од воздухот од вентилаторот.
„Се разбира, таа не беше жива; од респираторот излегуваше само воздух. Но, тоа беше најтешкиот момент. Веројатно најтешкиот момент во мојот живот, покрај смртта на мајка ми и татко ми“, се присети тој.
Како што одминуваа часовите, во болницата пристигнуваа бројни официјални лица.
Тебат се присети и на моментот кога тогашниот француски претседател Жак Ширак влезе во собата на Дијана заедно со сопругата Бернадет.
„Г-дин Ширак се поклони на крајот од креветот и си замина“, рече Тебат.
Набрзо пристигнаа и службените лица задолжени за погребните процедури на кралското семејство. Четворицата мажи го изнесоа ковчегот од болницата, придружувани од останатите членови на тимот.
Потоа, принцот Чарлс и сестрите на Дијана се упатија кон излезот, каде што ги пречека почесна стража.
Ковчегот со телото на Дијана беше изнесен од болницата околу 18:35 часот и префрлен во возилото што го однесе до авионот за Велика Британија.
А потоа следеше сцена што Тебат особено ја запамети.
Додека колоната возила се движеше низ улиците на Париз, граѓаните излегуваа за да се простат од принцезата.
„Додека возевме низ улиците на Париз, сите аплаудираа. Беше неверојатно. Многу, многу трогателно“, рече Тебат.
Поминаа 29 години од ноќта што го промени британското кралско семејство и остави длабока трага низ целиот свет.
За време на својот живот, Дијана стана една од најпрепознатливите жени на своето време, а нејзината хуманост, односот кон јавноста и начинот на кој ја користеше својата популарност за да сврти внимание кон бројни општествени проблеми, ја претворија во икона што го надживеа нејзиниот сопствен живот.
Секоја година на 31 август, на годишнината од нејзината смрт, вниманието на јавноста повторно се насочува кон нејзината животна приказна, но и кон последните часови на принцезата чија смрт во 1997 година го потресе целиот свет.