Американската кинематографска икона Џон Траволта ќе го има своето режисерско деби на Канскиот филмски фестивал во мај годинава, филм за шареното патување на едно дете во златното доба на комерцијалната авијација.
Познатиот 72-годишен актер за првпат застана зад камерата за да ја прикаже својата книга објавена во 1997 година, бајка насловена како „Ноќен лет до Лос Анџелес“ за осумгодишно момче кое за првпат патува со авион, следејќи ја својата мајка актерка на патот кон Холивуд.
Патувањето низ Америка ќе биде исполнето со средби со патници и низа неочекувани авантури под будното око на стјуардесите, од кои една ја игра Ела Блу Траволта, ќерката на Џон Траволта.
Патем, познатиот актер е и самиот професионален пилот. Својата прва пилотска дозвола ја добил на 22-годишна возраст.
Филмот ќе биде достапен директно на платформата на Apple TV од 29 мај.