Познатиот британски велосипедист Крис Фрум, четирикратниот победник на Тур де Франс, доживеа сериозна несреќа за време на тренинг и беше итно префрлен со хеликоптер во болница во Тулон. Иако е во стабилна состојба, се очекува да биде опериран поради повеќекратни скршеници.
Фрум падна од велосипедот за време на тренинг, а несреќата се случи без контакт со возила или други велосипедисти. Тој беше однесен во болница со хеликоптер, каде што лекарите констатираа сериозни повреди. Во соопштението издадено од неговиот тим, беа дадени детали за несреќата:
– Крис беше префрлен со хеликоптер во болница во Тулон вчера попладне по сериозна несреќа на тренинг (немаше други велосипедисти или возила). За среќа, Крис е стабилен и нема повреди на главата, но скенирањата потврдија пневмоторакс, пет скршени ребра и фрактура на лумбален пршлен, за што ќе биде опериран денес попладне. Ќе имаме повеќе информации по операцијата – соопштија од неговиот тим.
Крис Фрум е еден од најпочитуваните и најуспешните велосипедисти во светот, а оваа несреќа ја шокираше целата спортска јавност.
Повеќе информации за неговата здравствена состојба ќе бидат познати по операцијата.