Професионалната фудбалска лига (LFP) потврди во официјално соопштение дека Лион, по состанокот со финансискиот надзорен орган на францускиот фудбал DNCG, е исфрлен во Лига 2.
Тоа е потврда на привремената одлука донесена на претходниот состанок, според која OL автоматски би испаднал доколку не докаже финансиско подобрување.
Eagle Football Group, конзорциумот што го поседува Лион, се обиде да го убеди DNCG во стабилноста на клубот со продажба на уделот на Џон Текстор во англискиот Кристал Палас, како и со продажба на женскиот дел на Лион. Сепак, овие мерки не беа доволни за да се исполнат строгите финансиски критериуми.
Оваа одлука доаѓа и покрај оптимизмот на сопственикот на клубот Џон Текстор, кој по состанокот тврдеше дека ситуацијата е многу подобра и дека е задоволен од дискусијата.
„Од придонесот на нашите акционери е очигледно дека инвестиравме нов капитал, не само за DNCG, туку и за потребите на постапката за лиценцирање на УЕФА. Не треба да ја заборавиме добрата вест за продажбата на акциите во Кристал Палас. Нашата ликвидност значително се подобри“, рече Текстор.
Сепак, тоа не беше доволно. Според оваа одлука, Лион ќе игра во втората лига на францускиот фудбал следната сезона.
Олимпик Лион е основан во 1950 година и со децении прерасна во еден од најпознатите француски фудбалски клубови. Својот најголем успех го постигна на почетокот на 2000-тите, кога ја освои титулата француски шампион седум пати по ред (од 2002 до 2008 година).
Клубот е познат по развојот на млади играчи и силната академија која произвела бројни врвни фудбалери.
Во минатава сезона Лион заврши на 6-то место во Лига 1, што значеше борба за враќање на врвот на францускиот фудбал – сè до шокантната одлука да ги исфрли во втората лига.