Бројот на вооружени полицајци кои патролираат низ улиците на Лондон ќе биде зголемен, соопштија денеска лондонскиот градоначалник Садик Кан и комесарот на Метрополитен полицијата Бернард Хоган Хау.
Вооружените полицајци ќе бидат лоцирани во реонот на познатите лондонски знаменитости и места каде секогаш има многу посетители.
Според објаснувањето на полицијата, на улиците ќе бидат испратени дополнителни 600 вооружени полицајци, па нивната бројка сега ќе изнесува 2.800.
Ваквата одлука е донесена како последица на неколкуте терористички напади на европскиот континент, а со оваа мерка се настојува да се увери домашната јавност и посетителите на британскиот главен град во зголемената безбедност, но и да се предупредат потенцијалните напаѓачи.
– Немаме разузнавачки сознанија за некаков очекуван или потенцијален напад, па она што го правиме е резултат на сето она што го видовме во Западна Европа, изјави Хоган Хау.
Лондонските медиуми објаснуваат дека новите полицајци под оружје се тренирани за борба со тешко вооружени терористи.
Сите тие ќе бидат видливи на улиците на кои ќе престојуаат во текот на сите 24 часа.
Нивото на опасност во Лондон и во Велика Британија и натаму останува исто – дека ризикот од напад во главниот град и во земјата е „многу веројатен“.