Украинскиот претседател Володимир Зеленски денеска присуствува на Форумот во Чернобио во Италија, каде се очекува да ги повтори своите повици за повеќе оружје за неговата земја.
Тој треба да им се обрати на учесниците на форумот Европската куќа-Амбросети во Чернобио, еден вид мини-Давос организиран на брегот на езерото Комо. Тој пристигна таму вчера, неколку часа откако побара „повеќе оружје“ од своите сојузници, за време на состанокот на меѓународните поддржувачи на Киев во американската воздухопловна база Рамштајн во Германија.
Зеленски на Телеграм посочи дека планира во Чернобио да се сретне со претставници на италијански компании и со Џорџа Мелони.
Таа треба да го убеди во поддршката на Италија дури и ако еден од нејзините десничарски и крајнодесничарски коалициски партнери, Матео Салвини, жестоко се противи на каков било упад на Киев на руска територија, што украинската армија го спроведува од почетокот на август.
Состанокот меѓу Володимир Зеленски и Виктор Орбан во оваа фаза не е потврден, но унгарскиот националистички премиер рече дека „се разбира“ ќе се сретне со украинскиот претседател во Чернобио доколку се укаже можност.
„Имаме добри односи. Ако нема дијалог, нема шанси за мир“, изјави Орбан за новинарите.