Украинскиот претседател Володимир Зеленски се заблагодари на Германија за поддршката по средбата со германскиот претседател Франк-Валтер Штајнмаер, како дел од неговата прва посета на земјата од почетокот на руската инвазија. Зеленски допатува во Берлин од Рим, каде во саботата се сретна со италијанските власти и со папата Франциско.
Папата посочи дека Ватикан ќе помогне во репатријацијата на украинските деца кои беа земени од Русите.
Украинскиот претседател пристигна во Германија среде ноќ со авион на германската влада, а во воздушниот простор на земјата го придружуваа борбени авиони на германското воено воздухопловство.
„Во најпредизвикувачкиот период во модерната историја на Украина, Германија покажа дека е наш вистински пријател и сигурен сојузник кој е одлучно со украинскиот народ во борбата за одбрана на слободата и демократските вредности. Заедно ќе победиме и ќе го вратиме мирот во Европа“, напиша Зеленски во книгата гости на германското претседателство.
Се очекува Зеленски подоцна да се сретне со германскиот канцелар Олаф Шолц и неговиот кабинет за безбедност пред да отпатува во западниот град Ахен за да ја прими престижната награда Карло Велики за неговиот придонес во Европа.