Портпаролката на Министерството за надворешни работи на Русија Марија Захарова, коментирајќи ги потезите на финските власти, рече дека отворањето на руско-финската граница зависи од тоа дали Хелсинки ќе го напушти својот русофобичен курс.
„Неколку пати објавивме дека оваа одлука е од отворено политизирана природа, дека Хелсинки ја донел без никакви консултации со руската страна, која е секогаш отворена за дијалог со финските претставници за сите прашања што се однесуваат на безбедно функционирање на заедничката граница – изјави Захарова.
Границата меѓу Финска и Русија е затворена до понатамошно известување со одлука на финските власти. Финска почна да воведува ограничувања на граничните премини од ноември 2023 година поради неконтролираниот проток на бегалци од трети земји. Финските власти ја обвинија Русија дека наводно целно испраќа мигранти на границата.
Захарова ги отфрли обвинувањата против Русија за вмешаност во мигрантската криза во Европа, нарекувајќи ги двојни стандарди на Западот, пренесува Спутник.