Вооружени напаѓачи вчера киднапираа најмалку 75 луѓе од село во северозападна Нигерија, најново во серијата киднапирања во оваа африканска земја.
-Бројот на киднапирани луѓе од Рини е секако поголем од 75, изјави еден од жителите на ова село во северозападната нигериска држава Замфара, пренесоа британските медиуми.
Друг жител додаде дека вооружените напаѓачи, кои дошле во селото со повеќе од 50 мотоцикли, киднапирале над 80 луѓе, претежно деца и најстарите, и го ограбиле нивниот имот.
Портпаролот на полицијата го потврди киднапирањето, но одби да даде повеќе детали.
Нигерија се бори со зголемен број вооружени грабежи и киднапирања заради откуп, главно во северозападните области, каде безбедносните сили често пати не успеваат да ги спречат нападите на киднаперите.