Во Украина се фрлени неискористени вакцини против коронавирусот, откако лекарите што требало да се вакцинираат не се појавиле во договорените термини.
Во земјата денеска почна имунизацијата на населението, откако првата пратка од 500.000 дози вакцини од АстраЗенека минатата недела пристигна во земјата. Приоритетен e медицинскиот персонал.
Украинскиот министер за здравство Максим Степанов изјави дека Владата работи на тоа да се спречи фрлање на вакцините, додавајќи оти тоа се случува и во други земји.
Вакцините се фрлени, бидејќи кога ќе се отворат, употребливи се во следните два до три часа. Во Украина, која има 41 милион жители, речиси половина (47 проценти) од граѓаните изјавиле дека не сакаат да се вакцинираат.