Во судири помеѓу нигеријската војска и екстремистите загинаа најмалку 185 лица во местото Бага, рибарска заедница на североисток од државата, соопштија официјални лица.
Немирите во Бага започнаа во петок и траеја со часови, поради што населението беше приморано да побегне во соседни места во близина на езерото Чад, пренесе „Асошиејтед прес“.
Куќите, другите објекти и автомобили во подрачјето на Бага се запалени, а локален жител изјави дека војниците тоа намерно го направиле во текот на немирот.
Последните судири означуваат ескалација на бунтовите на север од Нигерија, населен претежно со муслимани, каде што е најактивна екстремистичката група Боко Харам.
Официјалните лица не можеа да кажат колку цивили има меѓу загинатите, а колку војници и екстремисти.
Телата на загинатите многу бргу се сахранети, според законите на локалната муслиманска традиција.
Елена Георгиевска