Карабинерите во Рим приведоа 65 лица како дел од голема операција против мафијашката структура од Калабрија Ндрангета, јавија локалните медиуми.
Според обвинението, уапсените ја контролирале територијата на главниот град, вклучително и каналите за шверц на дрога. Италијанските медиуми информираат дека полициската операција сè уште не е завршена, а деталите и резултатите ќе бидат презентирани подоцна.
Италијанските безбедносни органи пред повеќе од 10 години открија дека криминалната организација, за која се сметаше дека традиционално е активна во јужните делови на земјата, долго време е активна во северна Италија, како и во различни европски земји.
Ндрангета се смета за најмоќната група во сенка која го контролира снабдувањето со дрога од Јужна Америка во Европа.
Извор: МИА