Речиси еден милион луѓе веќе ја примиле експериментална вакцина против коронавирусот која ја разви фармацевтската група Синофарм, соопшти денеска кинеската компанија.
Кина во јули почна програма за итни случаи, во која досега беа вклучени три вакцини кои се во завршна фаза на тестирање за здравствени работници и други ранливи групи, иако тестовите допрва треба да ја потврдат нивната ефикасност.
Сингапурскиот портал ЦНА, повикувајќи се на Синофарм, информира дека досега не е забележана негативна реакција кај луѓето кои ја примиле вакцината.
Синофарм развива две вакцини, третата е на Синовак, и сите беа тестирани во итни случаи.
За вакцините на Синофарм, кои не дозволуваат коронавирусот да се размножува во телото, потребни се две дози, покажаа претходните истражувања.
Експерименталните фази на вакцината на Синофарм минуваат низ третата, последна фаза на клинички испитувања ширум светот, а се пријавиле 60.000 волонтери.
Она што е познато е дека меѓу градежните инженери, дипломати и студенти од странство кои биле дел од тестирањето, досега никој не се заразил, додава ЦНА.
Експертите, сепак, повикаа на претпазливост до објавувањето на конечните резултати од тестирањето, со цел да се утврди ефикасноста на вакцината.