Литванија, која е актуелен претседавач со ЕУ, ја предупреди Русија за евентуално влошување на односите со ЕУ поради засилените царински проверки по границата со балтичката земја, кои, според Вилнус, се политички мотивирани.
Пред околу три седмици, Русија наложи засилени проверки на литвански камиони, кои заминуваат во Русија, што доведе до големи загуби за литванските превозници.
– Ако вакви дејствија, политички мотивирани, продолжуваат без никакви објаснувања, тоа може да има негативни последици за односите Русија-ЕУ, предупреди литванскиот министер за надворешни работи Линас Антанас Линкевичус.
Брисел веќе ги критикуваше мерките, кои Москва ги наложи на Вилнус и ги оцени како дискриминаторски и неумесни, како и несоодветни согласно обврските на Русија како членка на Светската трговска организација.
Москва вчера објави дека може да го забрани увозот на млечни производи од Литванија поради епидемиолошки и санитарни ризици.