Бавно движечкиот метеоролошки систем „Дана“, кој донесе обилни дождови на почетокот на неделава, сега почнува да слабее, но повремени врнежи се уште се очекуваат денеска и утре.
Најобилните врнежи денеска ќе бидат насочени кон југот и истокот на Шпанија.
Портокалови предупредувања за дожд се во сила северно од Валенсија – особено во регионите Тарагона и Кастелон, како и на островите Менорка и Мајорка. Покрај тоа, предупредувања беа издадени во југозападна Андалузија, околу Хуелва и Кондадо.
Во овие погодени региони во следните 12 часа може да наврнат дополнителни 100 мм дожд. Бидејќи земјата е веќе заситена, ова може да доведе до дополнителни поплави.
Дождот треба да се намали во сабота, а во недела се очекува многу посув ден низ Шпанија.
Во областа Ла Торе во градот Валенсија синоќа повторно врнеше дожд, па улиците повторно беа покриени со кал, јавува Би-би-си. Бројни багери и камиони се исто така таму додека властите се обидуваат да отстранат десетици автомобили кои беа расфрлани од поплавите.
Некои од автомобилите се веќе отстранети, но ова е многу долга работа за службите кои работат на отстранување на последиците од катастрофалните поплави. .
На помош дојдоа трактори, околу 15, а луѓето беа „вооружени“ со метли, лопати и кофи, јавува репортер на Би-Би-Си од Валенсија.
Бројот на жртвите досега е 158, но властите велат дека уште многу луѓе се водат како исчезнати.