Украинскиот претседател Володимир Зеленски изјави дека очекува клучна европска одлука и одобрување на кандидатурата на Украина за Европската унија.
Во своето ноќно обраќање, тој додаде дека разговарал со 11 европски лидери на, како што рече, телефонскиот маратон за позитивна одлука за кандидатурата на Украина.
„Го продолжувам овој маратон – мора да обезбедиме максимална поддршка за нашата земја. Очекуваме клучна европска одлука“, рече Зеленски во четвртокот навечер.
Зеленски им се заблагодари на лидерите на Бугарија, Латвија, Грција, Шведска, Естонија, Чешка, Белгија, Австрија, Словенија, Молдавија и Литванија и ги повика лидерите да ја посетат неговата уништена земја.
Зеленски рече дека руските сили се обидуваат да уништат градови во источниот регион на Донбас на ист начин како што го уништија Мариупол.
За време на ноќното обраќање Зеленски додаде: „Во Донбас има постојани масовни воздушни и артилериски напади. Целта на окупаторите во оваа насока останува иста – тие сакаат да го уништат целиот Донбас чекор по чекор“.
Тој додаде дека руските сили истрелале седум проектили врз Миколаев, град во близина на Црното Море.
„Никој не загина, но пет лица се повредени. Имаше напади и во регионот Харков. Има жртви. „Имаше напади на границите на регионите Чернихив и Суми“, додаде тој.
Зеленски повторно апелираше да им се испрати уште тешко оружје. „Затоа постојано го нагласувавме забрзувањето на испораката на оружје за Украина“, рече тој.