Најмалку 39 луѓе настрадаа во разорен пожар што зафати болница во ирачкиот град Насирија во која лежеле пациенти заразени со коронавирусот, јави државната агенција ИНА.
„Здравствените екипи ги изнесуваа јагленисаните тела од запалената болница, додека многу пациенти се бореа за здив поради чадот кој се креваше од зградата“, јави репортерот на Ројтерс од местото на страотниот пожар.
Уште најмалку 60 луѓе биле згрижени во други болници во градот поради изгореници, повреди и проблеми со дишењето.
Пожарот бил ставен во контрола по неколку часа. Според надлежните, бројот на жртви речиси сигурно ќе расте, поради тоа што многу пациенти се водат како изчезнати.
Во последните неколку месеци имаше неколку случаи на катастрофални пожари во ковид-болници во Ирак, од кои најтешкиот беше во април, кога во оддел за третман на пациенти заразени со коронавирусот во Багдад, животите ги загубија 82 луѓе.