Четири лица се во критична состојба по стампедо на концерт на Асаке во Брикстон, Велика Британија. Наводно, многумина не можеле да влезат во просторот каде што се одржувал концертот (О2 академија) и долго стоеле надвор на ниски температури, по што решиле да упаднат во објектот. Концертот на крајот беше откажан.
Лондонската полиција соопшти дека вчера околу 21.30 часот на местото на настанот била повикана пожарна, брза помош и полиција. Во болница се пренесени осум лица, од кои четворица се во критична состојба. Повредите настанале при стампедо.
„Луѓето чекаа надвор со часови, а потоа се стискаа. Не можев да дишам“, напиша една жена на Твитер.
Полицијата соопшти дека е отворена истрага.
„Ова е крајно вознемирувачки инцидент кој остави четири лица во болница во критична состојба. Моите мисли и молитви се со нив и нивните семејства. Покренавме истрага за да откриеме што се случи синоќа“, изјави Аде Аделекан, командант на лондонската полиција.
Нигерискиот пејач Асаке (27) годинава го издаде својот деби албум „Mr Money With The Vibe“.