Шефот на полицијата на округот Колумбија во Вашингтон изјави синоќа дека се уапсени 217 лица кои се товарат за предизвикување немири и нанесување полесни повреди врз шест полицајци за време на вчерашните протести против претседателот Доналд Трамп.
Полицијата била принудена да употреби солзавец во судирите со демонстрантите.
– Властите во Вашингтон нема да толерират насилство од страна на учесници во собирите против Доналд Трамп, изјави градоначалникот на главниот град Муриел Баузер.
Маскирани демонстранти во црна облека кршеа прозорци на ресторани, банки и автомобили и фрлаа канти за смет во центарот на Вашингтон, по што се судрија со полицијата. Тоа се случи непосредно пред почетокот на претседателската инаугурација на Доналд Трамп.
Ширум Европа и Азија, исто така, се одржуваат протести против Доналд Трамп. Противниците на Трамп најмногу се гневни на неговите коментари за време на предизборната кампања во врска со жените, илегалната миграција и муслиманите, како и најавата дека ќе изгради ѕид на границата со Мексико.