Ден по стравотната експлозија во Бејрут, жителите на главниот град, но и на цел Либан сè уште се во шок, а спасителите се во грчевита борба да извлечат луѓе за кои се надеваат дека се преживеани под урнатините.
Според Црвениот крст, екипи на спасители се во потрага по околу 100 луѓе кои се исчезнати по експлозијата. Од пристаништето и околните разурнати улици, прекриени со остатоци од разурнати згради и превртени автомобили, и утрово се издига чад. Во текот на ноќта, либанската армија со хеликоптер се обидувала да ги изгасне пожарите во околината на експлозијата.
Болниците се преплавени со пациенти, а лекарите се принудени да им помагаат само на повредените во тешка состојба. Илјадници луѓе чии домови се разурнати во експлозијата се без покрив над глава.
„Сведочиме на огромна катастрофа. Има жртви и повредени насекаде“ изјави денеска претседателот на Црвениот крст на Либан, Жорж Кетане, кој додаде дека според последниот биланс, во вчерашната страотна експлозија на склад со околу 2.750 тони експлозив во бејрутското пристаниште, загинале над 100 луѓе, а околу 4.000 се повредени.
Претседателот Мишел Аун за денеска закажа итна седница на Владата на која ќе биде прогласена вонредна состојба во земјата. Прогласена е тридневна жалост во цел Либан.
Според Црвениот крст, екипи на спасители се во потрага по околу 100 луѓе кои се исчезнати по експлозијата. Од пристаништето и околните разурнати улици, прекриени со остатоци од разурнати згради и превртени автомобили, и утрово се издига чад. Во текот на ноќта, либанската армија со хеликоптер се обидувала да ги изгасне пожарите во околината на експлозијата.
Во меѓувреме, првите понуди кон Либан за помош во справувањето со последиците од експлозијата стигнаа од повеќе соседни и земји од регионот. Катар, Египет, Кипар, Грција и Дубаи понудија помош во медицинска опрема и персонал. Помош понудија и Соединетите Американски Држави, Европската унија и Австралија, како и повеќе други земји.