Улични надзорни камери регистриале удар на гром во Американец во градот Спринг, во сојузната држава Тексас.
Алекс Кореас ги шетал своите три кучиња кога бил погоден од молња. Кореас веднаш паднал на земја.
Среќа во несреќа е што инцидентот се случил во близина на болница, а неколку членови на персоналот го виделе ударот на громот и веднаш поитале во помош на човекот.
Кога стигнале до Кореас тој не дишел, облеката му била изгорена, а чевлите и чорапите му излетале од нозете, пренесе Еј-би-си.
Лекарите започнале реанимација и така му го спасиле животот.
Семејството на Алекс Кореас за новинарите изјавило дека тој закрепнува во болница и дека во моментов чувствува големи болки, но се очекува да се опорави.
Веднаш по ударот, преплашените кучиња побегале и полицијата ги пронашла во блиската шума.