Претставничкиот дом на Велика Британија го одобри договорот на премиерот Борис Џонсон за излегување на Велика Британија од Европската унија со 330 гласа „за“ и 231 „против“.
Овој Закон ќе стави точка на повеќе од тригодишните натегнувања околу „разводот“ меѓу ЕУ и Велика Британија.
Ова ќе му овозможи на британскиот премиер Борис Џонсон да ја сврти страницата на една од најдлабоките политички кризи кои ја погодија земјата во последните десет години.
„Време е Брегзит да се заврши. Овој предлог-закон тоа и ќе го направи“, истакна министерот за Брегзит, Стивен Баркли пред пратениците.
Законот треба да биде усвоен и од Домот на лордовите и Европскиот парламент, што се смета како формалност, пред Велика Британија да го заврши своето речиси 50-годишно членство во проектот за евроинтеграција.