Обединетото Кралство има намера да го укине правилото дека луѓето мора да бидат изолирани откако ќе бидат заразени со коронавирус, пишува Телеграф.
Премиерот Борис Џонсон сака трајно да ги укине законите за коронавирус бидејќи бројот на случаи на Kовид-19 во Британија продолжува да опаѓа, пишува весникот, додавајќи дека општите упатства ќе останат на сила, но нема да резултираат со казни доколку не се почитуваат.
На плановите ќе се работи во текот на следните недели, а одлуката се очекува на пролет, се додава. Минатата недела, министерот за здравство Саџид Џавид рече дека самоизолацијата поради Ковид-19 во Англија ќе се намали на пет дена од седум, откако лицето ќе има два негативни теста.
Џонсон, исто така, треба да го укине планот Б од ковид-рестрикциите, воведен минатиот месец за да го забави ширењето на варијантата омикрон, објави претходно Телеграф.
Според планот Б во Англија, луѓето беа охрабрувани да работат од дома што е можно повеќе и да носат маски во јавниот превоз и на јавни места, а мораа да покажат сертификати за ковид за да влезат во ноќни клубови и големи настани.