Поглаварот на Украинската православна црква-Киевски Патријархат, Филарет, кој ја нарече пандемијата на коронавирусот „божја казна“ поради дозволувањето на истополовите бракови, е примен во болница откако било откриено дека е заразен со коронавирусот.
Според официјалното соопштение од црквата, патријархот се чувствува добро и прима терапија.
Во интервју во март, Филарет, кој има 91 година, тврдеше дека коронавирусот е „божја казна за грешноста на човештвото,“ а потоа појасни: „пред се, мислам на истополовите бракови“.
Изјавата тогаш беше осудена од групите за заштита на човековите права, а организациите на ЛГБТ-заедницата во Украина го тужеа верскиот лидер поради изјавата.
Украинската православна црква-Киевски Патријархат е една од најголемите верски заедници во земјата, со околу седум милиони членови, што е една четвртина од православните верници.
Во Украина досега се регистрирани вкупно 143.000 случаи на Ковид-19, а повеќе од 3.000 луѓе починаа како последица на компликации од болеста.