Украинските градови Бахмут и Маринка се уште се епицентар на борбите, соопшти Генералштабот на вооружените сили на Украина. Дваесет и пет „борбени конфликти“ се случиле околу Купјанск, Лиман, Бахмут, Авдивка и Маринка, се наведува во дневниот извештај.
„Борбите за градот Бахмут продолжуваат. Окупаторите извршија воздушни напади кај Бахмут и Иванивска. Украинските одбранбени сили одбија бројни непријателски напади во близина на градот Маринка. Покрај тоа, непријателот го гранатираше селото Побиеда во регионот Доњецк”, се огласи Генералштабот на украинските сили.
Руските сили гранатираа станбени згради, куќи, градинка и други цивилни инфраструктурни објекти, при што беа повредени некои цивили, соопштија украинските вооружени сили.
Дневниот извештај, исто така, го истакнува „масивен ракетен и воздушен напад врз украинските цивилни и критични инфраструктурни објекти“, кои ги погодија градовите Днипро и Запорожје и населбите во регионот Харков.