Откако експлозија уништи голема брана на реката Днепар во јужна Украина, Министерството за земјоделство на Украина соопшти дека се очекува да бидат поплавени околу 10.000 хектари обработливо земјиште на северниот брег на реката во регионот Херсон, според првичните проценки.
Се очекуваше дека поплавите ќе бидат многу поголеми на јужниот брег на реката, во регионот под руска окупација, се вели во соопштението на Министерството на својата веб-страница. Детални информации ќе бидат објавени во наредните денови кога министерството ќе има појасна слика за состојбата.
„Полињата во јужна Украина може да се претворат во пустини веќе следната година“
„Покрај тоа, вештачката катастрофа ќе го наруши снабдувањето со вода во 31 систем за наводнување на полињата во регионите Дњепропетровск, Херсон и Запорожје“, соопшти Министерството.
„Уништувањето на хидроцентралата Каховка ќе значи дека полињата во јужна Украина би можеле да се претворат во пустини веќе следната година“, се додава.
Ќе биде загрозено и снабдувањето со вода за пиење во населените места. Дополнително, од Министерството за земјоделство велат дека очекуваат негативни последици за рибарството.
Украина и Западот се убедени дека Русите ја разнеле браната
Браната беше уништена вчера рано наутро во јужниот дел на Украина, во областа Херсон, окупирана од Русија. Кремљ го обвинува Киев. Од друга страна, Украина и многу западни набљудувачи се убедени дека руските окупатори сами ја разнесоа браната, веројатно за да спречат планирана украинска контраофанзива.
Русија води војна против Украина повеќе од 15 месеци.