Украинската служба за безбедност уапси висок агент кој е осомничен за „велепредавство“. Агентот со својот телефон фотографирал разни документи за воените позиции во Запорожје, а кај него биле пронајдени и големи суми пари.
Покрај снопови пари, најдени се и СИМ-картички кои, според Украинската служба за безбедност, биле издадени од руски мобилни оператори, два ножа и прирачник за изучување англиски јазик.
„Пронајдени се и докази за постојана комуникација со претставници на полицијата и државните органи на Руската Федерација, вклучително и блиски роднини на осомничениот агент“, се вели во соопштението на Службата.
Генерал-мајор Виктор Јахун, кој беше заменик-шеф на СБУ до 2015 година, тврди дека овој случај докажува дека е потребно темелно чистење на службата, која долго време има блиски односи со руската ФСБ.
Од почетокот на руската инвазија на 24 февруари минатата година, повеќе од 60 членови на СБУ и на Јавното обвинителство кои останаа на окупираната територија се осомничени за соработка со руските сили.