Американскиот претседател Доналд Трамп, кој беше хоспитализиран поради инфекција со коронавирус, вчера побарал да биде пуштен од болница, објави Си-Ен-Ен, повикувајќи се на извори.
Изворот навел дека Трамп сака да ја напушти болницата, затоа што неговиот престој таму, според неговата перцепција, прави тој да изгледа како колеблив човек и проектира слабост пред гласачите на претстојните избори, закажани за 3 ноември.
„Њујорк Тајмс“ исто така објави дека американскиот претседател сакал што побргу да ја напушти болницата.
Состојбата на Трамп продолжи да се подобрува, а во Белата куќа се надеваат дека тој ќе ја напушти болницата во текот на денот, јави „Фокс њуз“, повикувајќи се на изјавата на шефот на кабинетот на Белата куќа, Марк Медоуз.