Товарен воз што пренесувал сулфурна киселина, излета од шините и се преврте на околу 20 километри од местото Џулија Крик, во северозападниот дел на австралиската сојузна држава Квинсленд.
Возот се состел од 26 вагони-цистерни, во кои имало 200 илјади литри од оваа опасна хемикалија.
Полицијата во Бризбејн соопшти дека три лица кои ја придружувале композицијата, се повредени и пренесени во болница.
Локацијата каде се превртел товарниот воз е прогласена за забранета зона, а појасот во кој не е дозволен пристапот е широк два километри.
Во соопштението на полицијата не се наведува што го предизвикало излетувањето на возот од шините, како и колкаво количество од сулфурната киселина се излеало.
Станува збор за опасна хемикалија која во допир со човечката кожа предизвикува тешки изгореници.
Местото на несреќата се наоѓа во реон кој е погоден и со поплави, па полицијата и спасувачките екипи тешко доаѓаат до возот и до превртените вагони.