Авганистанската Влада и претставниците на Талибанците во земјата ги продолжуваат преговорите, втор ден по ред,во главниот град на Катар, Доха. И покрај вчерашниот гест на Талибанците, кои ослободија 22 владини војници, крајот на разговорите останува непредвидлив поради длабоките разлики меѓу двете страни. Војната во Авганистан трае веќе 19 години.
Главните теми на разговор се прекинот на огнот, видот на државниот режим и други нерешени социјални и економски прашања.
Вчера, на почетокот на разговорите, преговарачот на авганистанската Влада, Абдула Абдула, го изрази главното барање на Кабул за хуманитарен прекин на огнот. Талибанците, од своја страна, соопштија дека огнот може да се запре еднаш и засекогаш, ако исламскиот закон биде воведен како официјален систем на управување на земјата.
Владиниот тим за преговори вклучува четири жени од вкупно 21 лице, а нема ниту една од редовите на Талибанците.
Многу Авганистанци стравуваат од делумно или целосно враќање на Талибанците на власт.