Тајфунот Бофа го погоди изутринава јужниот дел на Филипините, носејќи со себе силни ветрови и поројни дождови, кои уништија повеќе далноводи и корнеа кровови од куќи.
Бофа, кој е најсилниот тајфин што оваа година ги погоди Филипините, најпрво пристигна во Баганга во источниот дел на островот Минданао, јави ДПА. Тајфунот со себе носи ветрови со брзина од 175 километри на час.
Повеќе од 41 илјада лица беа евакуирани рано изутринава во околу илјада засолништа на островот, кои ги подготви Владата, изјави претставник на Цивилната заштита.
Засега нема информации за евентуални жртви, но локалните власти истакнаа дека илјадници жители ги напуштиле крајбрежните делови и планинските области стравувајќи од евентуални поплави и лизгање на земјиштето.
Локалните власти ги затворија училиштата, а прекинат е и поморскиот сообраќај во централниот регион Висајас и на Минданао. Околу сто внатрешни летови се исто така откажани.
Секоја година околу 20 силни бури и тајфуни ги погодуваат Филипините, најмногу во периодот од јуни до октомври, а Бофа е 16-от оваа година.