Американскиот претседател Џо Бајден и канадскиот премиер Џастин Трудо ветија за време на посетата на Бајден на Канада дека ќе застанат обединети против авторитарните режими и ќе ја намалат сопствената зависност од другите земји за клучните суровини и полупроводници.
Канада има изобилство на минерали клучни за производство на батерии и електрични возила, но Кина моментално доминира на светскиот пазар.
„Верувам дека имаме неверојатна можност да работиме заедно, така што Канада и Соединетите Држави можат да набават и да се снабдуваат овде во Северна Америка со сè што ни е потребно за сигурни и одржливи синџири на снабдување“, рече Бајден во говорот пред канадскиот парламент во Отава.
„Нашиот заеднички просперитет е длабоко поврзан со нашата заедничка безбедност“, додаде Бајден. Американскиот претседател рече дека двете земји членки на НАТО „ќе ја бранат секоја педа од територијата на НАТО“.
Трудо рече дека двете земји ќе застанат рамо до рамо со Украина.
„Нашиот начин на живот се соочува со повеќе закани во исто време“, истакна тој.
„Безбедносната политика е климатска политика (и таа) е економска политика“, повтори Трудо трипати во својот говор.
Бајден ја посети Отава помалку од една недела откако кинескиот претседател Си Џинпинг замина за Москва.
„Со зголемената конкуренција, вклучително и од сè понаметливата Кина, нема прашање зошто е важно сега да се свртиме еден кон друг за да го изградиме северноамериканскиот пазар за сè, од полупроводници до батерии за соларни панели“, рече Трудо.