Топлотните бранови ќе се случуваат сè порано и сè почесто во иднина, соопшти денеска Светската метеоролошка организација (СМО), посочувајќи на топлотните бранови кои зафатија делови од Европа оваа година уште пред официјалниот почеток на летото.
– За жал, денес сме сведоци како ќе изгледа иднината, рече Клер Нулис, портпаролка на Светската метеоролошка организација.
Екстремно високите температури кои се проширија од Северна Африка во јужна Европа, а се очекува да ги погодат Швајцарија и Германија овој викенд, според СМО се покарактеристични за јули и август.
– Во некои делови на Шпанија и Франција, температурите неодамна се зголемија за повеќе од 10 степени Целзиусови над просекот за овој период од годината, рече Нулис.
Шпанија, Португалија, Унгарија и Србија, исто така, се погодени од суша, додека предупредувања за топлотни бранови беа издадени надвор од Европа за речиси една третина од населението на САД оваа недела.
– Како резултат на климатските промени, топлотните бранови почнуваат порано, стануваат почести и посилни поради концентрациите на стакленички гасови во атмосферата кои се на рекордно ниво, потенцира Нулис.
Извор: МИА