Денеска во Индонезија започна масовна вакцинација, но експертите велат дека тоа што прво ќе бидат вакцинирани младите, нема да помогне во намалувањето на смртните случаи, бидејќи старите лица се најзагрозени.
Во Велика Британија, првиот што ја прими вакцината Ковид-19 беше 90-годишна пензионерка. Во Канада, првиот примател беше само нешто помлад со 89 години. Во Германија првиот вакциниран беше дедо во старечки дом стар 101 година.
Но, во Индонезија, земјата најпогодена од вирусот во Југоисточна Азија со 836.718 потврдени случаи и 24.343 смртни случаи, владата избра неортодоксна стратегија за вакцинација, пишува Ал Џазира.
Во првата фаза, која започнува денес и продолжува до крајот на март, 1,3 милиони здравствени работници и дополнителни 17,4 милиони вработени во јавните служби – полицајци, војници, наставници и бирократи бесплатно ќе ја добијат вакцината изработена од Кинеска компанија Синовац Биотек.
После тоа, ќе се вакцинираат повозрасните вработени.
– Индонезија е насочена кон продуктивна возраст од 18 до 59 години наместо постари луѓе, бидејќи не сме ја завршиле третата фаза од клиничките испитувања за луѓе на оваа возраст со вакцината Синовац – изјави портпаролот на Министерството за здравство, д-р Надија Викеко.