Унгарскиот министер за надворешни работи Петер Сијарто денеска изјави дека војната во Украина не може да се реши на бојното поле.
„Сите треба конечно да разберат дека оваа војна не може да се реши на бојното поле“, напиша Сијарто на Фејсбук и нагласи дека договор може да се постигне само на преговарачка маса.
Тој додаде дека украинските политичари го нападнале унгарскиот премиер Виктор Орбан, откако тој повторно повикал што поскоро да се постигне мир.
„Нема ништо ново во тоа. Политичарите кои се залагаат за мир редовно се соочуваат со напади и критики. Нема да се откажеме. Ќе продолжиме да инсистираме дека најважната задача е да се спасат човечки животи. Колку подолго трае војната, толку повеќе луѓе ќе умираат“, рече Сијарто.
Тој истакна дека секој ден од војната резултира со стотици или дури илјадници смртни случаи.