Пред патувањето на шведскиот премиер во Турција следната недела, шефот на шведската дипломатија Тобијас Билстром рече дека Стокхолм треба да ја увери Анкара со тоа што ќе се дистанцира од курдските групи во Сирија, јави ДПА.
– Владата во Стокхолм повеќе не сака да ја поддржува курдската милиција Сили за заштита на народот (YPG) и нејзиното политичко крило Демократската унија (PYD), изјави Билстром за локалните медиуми.
Според медиумските извештаи, тој посочил дека двете организации се премногу тесно поврзани со забранетата ПКК, која Европската Унија ја означува како терористичка организација. – Тоа не е добро за односите меѓу Шведска и Турција, објасни министерот Билстром.
Шведскиот премиер Улф Кристерсон во вторник треба да отпатува за Анкара за да го убеди турскиот претседател Реџеп Тајип Ердоган да ја прекине блокадата на Шведска и Финска за приклучување кон НАТО.
Извор: МИА