Германскиот канцелар Олаф Шолц денеска изјави дека правото на азил е составен дел на германскиот правен и вредносен систем и ги отфрли повиците за радикални реформи.
Шолц тврди дека неговата влада го зголемила бројот на депортации од Германија и работи на зголемување на бројот на летови за Авганистан и Сирија „штом ситуацијата на теренот дозволи“, и дека „криминалците“ ќе бидат депортирани „според законот и ред, како што и доликува на уставна држава“, пренесува Гардијан.
„Со некои наши мерки ги поместивме границите на она што го дозволува нашиот Устав и европските договори. Ова особено важи за привремените гранични контроли, кои мора повторно да се воспоставуваат и продолжуваат на секои шест месеци. „Но, јасно е дека не можеме и не смееме да одиме подалеку од сегашниот закон“, рече Шолц во дебатата за миграциската политика во Бундестагот.