Рускиот министер за одбрана Сергеј Шојгу рече дека Русија намерно ја забавува својата офанзива во Украина за да дозволи цивилите да се евакуираат, додека висок безбедносен функционер рече дека Москва не е „оптоварена со рокови“ во тримесечната војна.
Нивните коментари сигнализираа дека Русија не гледа крај на војната бидејќи се обидува да го отфрли впечатокот дека е исцрпена и дека скапата „специјална воена операција“ е во застој, според Ројтерс. Украина и нејзините западни сојузници велат дека Русија изгубила динамика откако наишла на силен украински отпор и претрпела големи загуби во луѓе и опрема.
„Се прогласува прекин на огнот и се создаваат хуманитарни коридори за да се извлечат луѓето од околните области“, рече Шојгу во телевизиско интервју на 90-тиот ден од војната.
„Се разбира, ова ја забавува офанзивата, но ние го правиме тоа намерно за да избегнеме жртви меѓу цивилното население“, им рече тој на министрите за одбрана на Организацијата за заедничка безбедност (CSTO), воениот сојуз на Русија и пет поранешни советски републики.
Во одвоени коментари, Николај Патрушев, секретар на Советот за безбедност на претседателот Владимир Путин, рече дека сите цели на претседателот во Украина ќе бидат исполнети бидејќи вистината е на руска страна.
„Ние не сме оптоварени со рокови“, рече тој во интервјуто во кое го повтори ставот на Русија за денацификација на Украина, нешто што Киев и Западот го негираат како лажен изговор за војна.
„Нацизмот мора да биде 100 отсто избришан или пак ќе крене глава во Европа за неколку години, на уште погрд начин“, рече Патрушев.
И покрај коментарите на Шојгу за поштеда на цивили, Обединетите нации забележаа 3.930 цивилни жртви за време на конфликтот. Русија повторува дека не цели на цивилни области и ја обвинува Украина, без докази, дека ги користи луѓето како „човечки штит“.