Шефот на Меѓународната агенција за атомска енергија (МААЕ) Рафаел Гроси денеска ја посети нуклеарната централа во Запорожје во југоисточна Украина, која е под контрола на руските сили, во обид да се избегне ризикот од нуклеарен инцидент.
Гроси во нуклеарната централа пристигна со автомобил. Запорожје е најголемата нуклеарна централа во Европа, каде директорот на МААЕ ќе ја проценува ситуацијата на лице место, изјави портпаролот на агенцијата на ОН. Гроси сака од прва рака да ја процени „нуклеарната безбедност и заштитните мерки“ и да продолжи со напорите за постигнување договор за заштита на нуклеарниот објект.
„Не се откажувам, напротив, мораме да ги удвоиме напорите, мора да продолжиме“, рече Гроси. Ова е негова втора посета на таа нуклеарна централа, а во пресрет на посетата рече дека „и покрај нашето присуство во централата во последните седум месеци, ситуацијата во Запорожје е многу нестабилна и опасна“.
Тој исто така рече дека заканата за безбедноста и нуклеарната безбедност е очигледна, како и потребата да се реагира веднаш за да се спречи инцидент. Русија и Украина меѓусебно се обвинуваат за гранатирање на областа на нуклеарната централа, а Гроси се залага за договор за безбедноста на таа централа меѓу двете завојувани страни.
Гроси до нуклеарната централа бил придружуван од руската армија. Тој е придружуван од нова група експерти на МААЕ кои се постојано присутни во електраната од септември минатата година. Нуклеарната централа не произведува струја од септември, кога беше исклучен и последниот од шесте реактори.
Гроси, кој во понеделникот се состана со украинскиот претседател Володимир Зеленски, рече дека неговиот притисок да се преговара за нуклеарен договор е сè уште жив и дека ги прилагодува предлозите за да постигне одреден напредок.