Претседателот на Европскиот Совет, Шарл Мишел, во телефонски разговор со рускиот претседател Владимир Путин денеска заклучил дека односите помеѓу ЕУ и Русија се на најниско ниво досега.
Во пресрет на самитот на лидери на ЕУ што треба да се одржи на крајот на оваа недела, Мишел и Путин разговарале за односите помеѓу ЕУ и Русија и заклучиле дека несогласувањата се бројни.
-Моментално има несогласувања во многу области. Од перспектива на ЕУ односот со Русија може да заземе нов правец доколку има одржлив напредок во делови како спроведувањето на Договорите од Минск, крај на хибридните и сајбер нападите врз земјите членки и почитување на човековите права, рекол Мишел.
Станало збор и за случајот на Алексеј Навални осуден на затворска казна и кого ЕУ го смета за политички затвореник поради неговиот отпор кон режимот на Путин.
Мишел му порачал на рускиот претседател дека треба Навални да биде ослободен и да се спроведе транспарентна истрага за обидот за убиство врз него. Лидерите разговарале и за вакцините. Спутник В сѐ уште не е одобрена во ЕУ.