Проруските власти во јужна украинска област Херсон денеска објавија дека ќе започнат со евакуација на лицата со намалена подвижност од окупираниот град Каховка, дел од поширокото раселување на цивилите од источниот брег на реката Днепар. Русија минатиот месец го напушти западниот брег – вклучувајќи го и градот Херсон – во едно од најголемите повлекувања на војната во Украина.
Повлекувањето значи дека широкиот Днепар сега е првата линија на војната на југот на земјата, бидејќи двете страни разменуваат жесток оган од нивните позиции на спротивните брегови.
Управата на Каковка, назначена од Русија, најави дека неподвижните луѓе ќе бидат однесени во областа Хеническ на југоистокот.
„Грижете се за себе и за вашите најблиски!“ гласи објавата на Телеграм, каде властите ги охрабруваат луѓето да аплицираат за евакуација.
Пред да се откаже од Херсон, Русија евакуираше десетици илјади жители во операцијата што Украина ја опиша како присилна депортација. Властите во Херсон сега ги повикуваат луѓето да напуштат делови од источниот брег, ветувајќи им на оние што го прават тоа дека ќе бидат згрижени на друго место.