Русија и Кина ги промовираат своите вакцини против коронавирусот преку обиди за клевета на сличните американски препарати, соопшти Белата куќа, повикувајќи се на констатациите на Стејт департментот.
– Тоа не е само конкуренција на вакцините: ризикот и влијанието се дека овој вид дезинформации се фокусираат на претерување со несаканите ефекти на западните вакцини, изјави на брифинг портпаролката на претседателската администрација, Џен Псаки.
Според неа, јавноста е доведена во заблуда со лажните тврдења дека вакцините на производителите Модерна и Фајзер, кои се потпираат на мРНК-технологијата, не ги поминале потребните испитувања и оти се опасни.
– Кина исто така тврди дека САД … не дозволуваат други земји да купуваат вакцини, и покрај доказите за спротивното. Ширењето на тврдењата дека одобрените лекови се неефикасни и не помагаат … е штетно, нагласи Псаки.