Доволно одминатата возраст на кандидатите за претседател на САД на изборите во 2020 година е „проблем“, оцени поранешниот американски секретар за одбрана Роберт Гејтс во интервју за телевизијата Си-Би-Ес.
Конкретно тој говореше за интелектуалните способности на поранешниот потпретседател Џо Бајден, сенаторот Берни Сандерс и актуелниот шеф на државата Доналд Трамп. Во моментов Бајден има 76 години, Сандерс 77, а Трамп е на возраст од 72 години.
– Не сум убеден дека на таа возраст може да се зачува остроумноста која би можеле да ја имате на возраст од 60 години, изјави Гејтс, кој и самиот има 76 години.
Тргнувајќи од свое искуство, тој додаде дека прашањето за интелектуалните способности во одмината возраст е проблем како за него, така и за споменатите кандидати, „кои не се доволно енергични за функцијата претседател на САД“.
Гејтс, кој е републиканец, смета дека претседателот Трамп на возраст од 72 години можеби е исто така престар за таа функција. Трамп е највозрасниот претседател досега по поранешниот претседател Роналд Реган, кој го започнал својот втор мандат на 73-годишна возраст.
Гејтс укажа дека Реган сепак бил „доволно голем претседател“.
Демократската партија во САД исфрли дваесетмина учесници во трката, од кои најмладиот има 37 години, а најстариот има 77, кои се натпреваруваат за номинацијата претседателски кандидат кој ќе се бори против Трамп на следните избори во ноември 2020 година. Двајцата највозрасни, Бајден и Сандерс, се постојано на врвот на регионалните и националните анкети за популарност на демократските кандидати во претседателската трка.