Поранешниот командант на армијата на босанските Срби генерал Ратко Младиќ, кој вчера беше пренесен во болница откако му се слоши за време на судското рочиште, денеска попладне повторно е вратен во својата ќелија во затворот на Хашкиот трибунал, изјави портпаролот на Судот во Хаг Нерма Јелачиќ.
– Ратко Младиќ е вратен во затворот откако медицинските прегледи потврдија дека нема проблеми по неговото здравје и не е потребно лекување, истакна Јелачиќ.
Адвокатот на Младиќ нагласи дека кога неговиот 70-годишен клиент се пожалил вчера дека му е лошо, тој се уплашил дека Младиќ добил инсулт, бидејќи не можел да ги движи десната рака и нога, но анализите не ја потврдиле ваквата опасност.
– Сега мислам дека или има зголемено ниво на шеќер во крвта или висок крвен притисок. Вчера и двете беа повисоки од нормалното, изјави адвокатот Бранко Лукиќ, изразувајќи надеж дека процесот ќе може да продолжи в понеделник.
Адвокатот предупреди дека нестабилната здравствена состојба на Младиќ може повторно да влијае врз процесот и најави дека е можно да поднесе барање за намалување на времето кое Младиќ треба да го минува во судницата неделно.